விழாக் காலம்
விடிவு காலமா?

விடியல் சேர்க்குமா?

அவியல் அணிகள்
ஆட்சி சேர்க்குமா?

குவியல் பணம்
குண்டி நனைக்குமா?

கும்மிருட்டு வாழ்க்கை
வெளிச்சம் காணுமா?

"கல்விக் கண் கொடுத்த காமராசர்"

"கல்விக் கண் கொடுத்த காமராசர்"

ஐயா!
கொடுத்த கண் படுத்துக் கொண்டது,
பஞ்சடைந்து விட்டது
பழுதடைந்து விட்டது.

'ஆடி' கொடு
ஆடியில்!
அணிந்து கொள்ள!

ஒளி மங்கிய கல்வி
கோருகிறது உம்மிடம்
பார்வை!

சோடா புட்டியானாலும்
பராவாயில்லை!
சோதனை தீர!

உம் பிறந்த நாளில்
பெருமை கூற!

கல்விக் கண்ணா?

குருடாயிருந்த கல்வி
குவலை விழி
குவலயம் நோக்கி!
பெற்றது உம்மால்!

நெருடான எண்ணம்
நேரிய வழி சென்றது!

உடல் பசி தீர உணவு!
உடுக்க சீருடை!
புத்தகம் இலவசம்!

இன்றும் தொடர்கிறது
இத்யாதி!

இருப்பினும்
இரு விழிகளில் பிறை நோய்!
அறுவை சிகிச்சை அவசியம்!


இப் பிறந்த நாளில்
பரிசோதனை தேவை
உடனடியாக விழிகளைக் காத்திட!
பார்வையை சேர்த்திட!

கோபம் குறைத்திடு
வேகம் தவிர்த்திடு

தாகம் போக்கிடு
தவிப்பு நீக்கிடு

உள்ள நிலை உணர்ந்திடு
உலகியல் புரிந்திடு

உன்னைப் பற்றி
உலவும் சேதி

உதறி நின்றிடு
உண்மை புரிந்திடு

காலம் வென்றிட
கவனமுடன் நடந்திடு

கரைந்திடும் புற்றென
இரைந்திடும் மனிதர்

இளிமுகம் தெளிந்திடு

குறைந்திடும் வளம்
காத்திடு
குணத்தில் சென்றிடு

கோணல் நிமிர்த்திடு
குவலயம் கண்டிடு

இலவம்!

பூத்தேன்,
பூத்து காய்த்தேன்,
காய்த்து குலுங்கினேன்
மகிழ்ச்சியாக.

என் உடலெல்லாம்உற்சாகம்!
முதிர்ந்தேன்!
அறுவடைக்கு தயாராக
ஆள் இல்லை!

வெம்பினேன்,
வெடித்தேன்!
வெறுப்புடன்! பொறுப்புடன்!

வெள்ளுடை தரித்தேன்!
வெளிக் கிளம்பினேன்!
வானத்தின்
வெண் பனியாக!

ஊரெங்கும்பறந்தேன்!
சிறுவர் விளையாட்டு
குமிழியாக!

செய்யிழை வேண்டுபவர்
மெய்யிழை மறந்ததால்!

உறங்கிய பொழுது
யாவும்
இறங்கிய பொழுது
ஒத்திகையில்
பல காலம்
ஒத்தாசை இன்றி
பத்தாசையுடன்

மொத்தாசையும்
சித்தமாக சென்றிடும்
காலம்செருவுடன்

நேரடிக்கு நேரடியாக
பருவும் சேர்த்து
பண்ணிடை இசையாக

பல்லாண்டு
பருவம் கழிந்து
உருவம் ஒடுங்கி
உள்ளம் நடுங்கி

ஊர் பயணம்

"அண்ணா நிலை"

ஊழல் ஒழிக்க ஊர்வலம்
உண்ணா நிலை
"அண்ணா நிலை"

அதிசயம்
அரசாங்க அழைப்பு
ஆலோசனைக் குழு
அமைப்பு

சட்டவரைவு
திட்டம் விரைவு
சாதனைப் பட்டியல் நீளும்
வேதனைப் பட்டியல்
விலைவாசியைப்போல்

அன்றாடப் பிரச்சனை
அவசியம் என்றாகி
பழகிய மக்களுக்கு
பஞ்சு மிட்டாய் வண்ணத்தில்
வகையாக அளித்திடும் திட்டம்

ஊழல், கறுப்புப் பணம்,
வெள்ளைப் பணமே!
வெறும் வாய் மெல்லும்.

மக்கள் கருத்த மேனியாய்
சுட்டெரிக்கும் கோடையாய்
சுருண்டு வாழும்
வெளி அக்கினியில்
வேக்காட்டில்
சாக்காடு

அன்றாடம்சரிந்த வாழ்க்கையில்
சப்பைக் கட்டும்
நிவாரண அரசியல்
நீளும் பட்டியல்

நிர்வாணம் மட்டுமே
உரிமையாக, கடமையாக,
ஊழல், ஊதல்,
கறுப்பு,செருப்பு

யதார்த்தம் விலக்கி
எக்கிடும் காட்சிகள்
கட்சிகள்

பதார்த்த விலை குறைத்திட
பக்குவம் இல்லை
ஏறும் விலை வாசி
எங்கும் நிலவும் யோசி

வாதத் திறமை
வழக்கறிஞர் வாழ்வியல்
அரசியல் அரங்கில் ஆனந்தம்
அன்றாடம்

வாதத் திறமை
வாய் பிளந்து மெச்சிடும்
'மெய்ஞான ஊட்டம்'

அடுக்கு மாடி

சாடியில் முளைத்த
செடி

அழுத நிலை!

ஆய்விற்கு அளிப்போம்
வீட்டிற்கு ஏன்
எடுத்துச் செல்ல வேண்டும்!

இப்படியே விட்டுச் செல்வாயா!
இறுதிச் சடங்கும்
இல்லை என்று
செல்வாயா!

ஈர்ப்பில் எங்களை இழுத்து
புது வார்ப்பில்
சென்றாயே!

பிறப்பின் வயதும்
இறப்பின் வயதும் ஒன்றாக
தாய்ப்பால் குடித்திட
தவித்த
உம் வாய்!

தளிர் உடல் நசுங்கிட
இடுகாட்டு
இல்லத்தில்
பசும்பால் வாங்கிச் சென்றாய்!

பரிதவித்தோம் நாங்கள்!
அழுத்தம் யாவும் பீறிட
அழுகையாய்
நீர் வழிந்திட
தேம்பி அழுத நிலை!

மூச்சும் பேச்சும்
முணகலும்
முழிப்பும்

வேகமும் சோகமும்
தாகமும் தவிப்பும்

தகிப்பும்சகிப்பும்
சமாதானம் ஏற்குமா!

இவ்வளவும் புரியவில்லை
என்றாய்
எவ்வளவுதான் புரிந்தாய்!

எள்ளளவு என்றாலும்
எண்ணெய் ஆக
வேண்டாமா!

எழில் தீபம்
ஏற்ற வேண்டாமா!

வெண்ணெய் திரளும்
தாழியாய்
மண் கலம் நிறைய
வேண்டாமா!

மனசு குளிர
வேண்டாமா!

சின்ன ஆசை என்றயே!
பெரிய ஆசை ஏற்பாயோ!

அரிய ஆசை
இதுவன்றி
பெரிய ஆசை
பிற ஏது?

பொய்யாமோ

உனர்த்தினேன் உம்மிடம்
பலமுறை
உள்ளன்பை
உளறல் என்று நினைத்தாய்
போலும்
மெய்யன்பை
பொய்யுரை
என்றாயோ!
பேச மறந்தாய்
ஏசவும் மறந்தாய்
கூசவில்லையா
மனம்!
கூறவில்லையா
தினம்!
பாசம் என்பதும்
பொய்யாமோ
தேசம் என்பதும்
பொய்யாமோ

சாதனை செல்வர்

உழைப்பைக் கருதாமல்
பிழைப்பை கருதி
பிழை ஏற்கும் உள்ளம்
பெருமை கொள்ள துள்ளும்
அருமை விலக்கிச் செல்லும்

அக்கறை இல்லை
அவரிடம் சொன்னேன்
இவரிடம் இல்லை
குறையுடன் தந்துவிட்டார்
குடி மூழ்கி விடவில்லை

அடுத்த முறை சரியாகும்
அவர் உறுதி
ஒவ்வொரு முறை சமாதானம்
சமாளிக்க தெரிந்தவர்
சந்தடி வென்றவர்
சாதனை செல்வர்

யாத்திரை

தரிசனம் நோக்கிய மக்கள்
நெரிசலில்
இரண்டாம் முறை இழப்பு
நூற்றுக்கு மேல்

ஊர்க்காரர் எவரும் இல்லை
பிறர் மரணித்தார்
ஓலத்துடன்
ஒடுங்கிய கோலத்துடன்

சிதறி ஓடி பதறிய மனிதர்
பஞ்சடிப்பதைப்போல்
நெரிசல் எந்திரம்
கரிசனம் காட்டவில்லை
தரிசனம் ஏற்கவில்லை

மருத்துவ உதவியும்
மக்களை நெருங்கவில்லை
நிவாரண நடவடிக்கை
நிர்வாண வேடிக்கை

நிமையங்கள் கழிந்தும்
நிம்மதி சேர்க்கவில்லை
மணித்தியானம் மறைந்தும்
நீளவில்லை

தடுப்பு நடவடிக்கை
செய்தியாக ஆவணங்களில்
ஆளுமை

"புல்மேடு யாத்திரை
தந்த நித்திரை"

கண்டவன்!

அவர் அப்படித்தான்
இவர் இப்படித்தான்

அவரும், இவரும்
அப்படி, இப்படி தான்!

எனக்கென்ன
அவனைப்போல் இருந்திட

அவன் என்னைப்போல்
தொடர்ந்திட!

அவரவர் வழி தனி
அதில் என்ன இனி!

விழிப்புற்றவன்
வினா வென்றவன்

விடை கண்டவன்!

நினைப்பு

பணச்செருக்கு
பதவியின் மிடுக்கு

அதிகாரத்தின் கொடுக்கு
அகங்காரத்தில் இருப்பு

ஆர்ப்பரிக்கும் சரக்கு
ஆளுமை நினைப்பு !

நிலா

வெண்ணிலா இரவுகள்
என் நிலா இரவாகுமா?

வெண்ணிலா இரவு
வெளிச்சத்தில் குறைவாகுமா?

மின் நிலா பழகிய மனிதம்
வின் நிலா விளக்கம்

ஏற்குமா?

ஈசல்

நீடித்திருப்போம்
நெடு நேரம்
நிலைத்திருப்போம் நெடுங்காலம்
நினைப்பில்லாமல்

நீல நயனம் செல்லாமல்
குவிக்கும் வெளிச்சம்
நோக்கி
கும்பலாக, கூட்டமாக
படையெடுப்பு ரீங்காரத்துடன்
ஆங்காரம் இல்லாமல்
அடர்த்தியாக

வெளிச்சத்துடன்
வேகம்
ஆதரவாக வெளிப்பட்ட
பல்லிகள்
அவ்வளவும்
இங்கேயா,

ஆவேசத்துடன்
ஒளி வெள்ளம் காத்திட
தாவிப் பிடித்து,
பிடித்து
கதை முடித்து
தொய்வில்லாமல்
தொடர்ந்து
அரை மணி நேர
போராட்டம்

பின்
பல்லாயிரம் உயிர்கள்
வாசல் கீழே
குப்பை நோக்கி சென்றது
துப்புரவில்

மணித் தியானத்தில்
மகா மனிதர்
யாவரும்
தம் இல்ல விளக்குகள்
யாவும்,
'டப்,டப்'
என்றணைத்திட

இருள் கவிழ்ந்திடும்
இல்லங்களில்
இப்படியாவது

மின் சிக்கனம்
வெப்பம் தணிப்பு
அதற்கென அறிவிப்பில்
ஆதரவளிக்காதோர்

அனைவரும்
ஈசல் முயற்சியில்
ஆதரவளித்தார்

விளக்குகள் அணைத்து
வெளிச்சமானார்!

பிடியில்!

நொடிப் பொழுதும்
வீணாகாமல்
பேசியே தீர்க்கும்
பிடியில்

பேய்ப் பிடித்து
நோய்ப் பிடித்து
அமுக்கு அமுக்கி
விரல் வளைந்து
நெளிந்து

செவிப்பறைகள்
தவிப்பறைகளாக
மாற்றி மாற்றி
கழுத்து நெளித்து

வாடிக்கை
வாழ்க்கையில்
வேடிக்கை சேர்க்கும்
வினோதம்!

மூடிக்கை வைத்து
மூலதனம் குவிக்கும்
கோடிக்கை கோரிக்கை வைத்தும்
வேடிக்கை பார்க்கும்

கோடிக்கை கொள்கை என்றாலும்
விருப்பத் தேர்வு
விடியலைக் காணுமா?

அன்றாட அலைக் கழிப்பு
தின்றாட தினம் உழைப்பு
திண்டாட்ட வாழ்க்கையிலும்
கொண்டாட்டம்!

குறைகளை இரு பக்கம் சேர்த்து
ஒலி இல்லாது சூழல்
வலி தரும் நிலையில்
தொடர்பு பேச்சில் தொலைக்கும் காசு
சில்லரையானாலும்
சீராக சேர்த்து வெள்ளமாக
செல்லமாக

உள் நாட்டு வெள்ளையன்
பெட்டிகளை நிரப்புவான்
கோடிக்கணக்கில் நிமையங்களில்
பல சமயம் பங்கும் உயரும்
சந்தையும் வளரும்
மக்களைத் தவிர்த்து!

சோங்கிடாதே!

"காணி நிலம் வேண்டும்
காணி நிலம் வேண்டும்
பராசக்தி காணி நிலம் வேண்டும்....."

மாகாணியில் அரிசி இல்லை
மாகாளி தருவாளா?

அட்டை எடுத்து வா
ஒரு ரூபா அரிசி
ரேசன் கடையிலே
ரோசமுடன் வாங்கிப் போ!

உண்ண முடியாதே அய்யா!

விற்க முடியாதா,
அண்ணே!

விருப்பம் உமக்கில்லை
விற்பனையாளர் வீட்டிற்கே
வருவார்!

விலாவாரியாக சொல்வார்
கூடுதல் சில்லரை
குமட்டும் அரிசிக்கு!

சிமிட்டு வியாபாரி
சீராக சேகரித்து
அடுக்கும் தொழில்
எல்லைகளைக் கடந்து!

தீட்டி உம்மிடமே
மறு சுழற்சி
வண்ணப் பைகளில்
வலம் வரும்!

வாங்கி உண்பாய்
சோங்கிடாதே!

பேசாதே!

யாரைப் பற்றியும் பேசாதே!
ஊரைப் பற்றியும் பேசாதே!

உன்னைப் பற்றி பேசு!

கெஞ்சும் உன் நெஞ்சைத் தொட்டு
பேசு!

கொஞ்சும் மொழியில்
வஞ்சமின்றி!

ரோசனா முர்ரே, நமது பரம்பரையின் அறிவுசான்ற கவிஞர்களில் ஒருவராக, உலகப் பகழ் பெற்ற இலத்தீன் அமெரிக்க எழுத்தாளர், பாலோ கொயெல்கொ நமக்கு அறிமுகம் செய்கிறார்.

''அன்பின் கையேடு" எனும் கவிதையை, நாம் இப்போது கீழ்க்காணும் வரிகளில் காண்போம்.

ஆன்மா புலப்படாது
தேவதையும்
சிந்தனைகள்
புலப்படா
ஆயினும்,
அன்பினால்
ஆன்மாவை
தேவதை உறைவிடத்தை
ஊகிக்கலாம்
உம் மனதை உணரலாம்
சில சிந்தனைகளால்
நீ
உலகை மாற்றலாம்

இழப்பு......?

சர்க்கார் மனிதன்
இழப்பு
சரித்திரம் ஆனால்
சாதா மனிதன்
இழப்பு......?

வேண்டும்!

கோவில்கள் வேண்டும்
குளத்திற்காக
வழிபாடு வேண்டும்
மரத்திற்காக
கழனிகள் வேண்டும்
உணவிற்காக
காடுகள் வேண்டும்
மழைக்காக
மழை வேண்டும்
உயிர்களுக்காக
உயிர்கள் வேண்டும்
உலகிற்காக
உலகம் வேண்டும்
வாழ்க்கைக்காக
வாழ்க்கை வேண்டும்
வாழ்வதற்காக

தீருமா!

எவர் செய்தாலும் ஏற்கமாட்டோம்!
மக்கள் உயிர் எடுக்கும் செயல்
ஒப்பமாட்டோம்!

உடமை அழிப்பு
உயிர் அழிப்பு
கடமை என்றாகுமா!
கொள்கை என்றாகுமா!

மாற்று அரசியல் வைக்கும்
வழிமுறை
மனிதருக்கா!
மயானத்திற்கா!

அனைவரும் இழந்த வெற்றிடம்
வேதனை இடம்
சாதனை என்றாகுமா!
சரித்திர புகழாகுமா!

தரித்திரர் நிலை உயர்த்துமா!
சந்ததி இழப்பு
அனாதை குழவி
நிலை தேறுமா!

கவர்ச்சி அரசாங்கம்
முயற்சி அறிவிப்புகளத் தாண்டுமா!
அல்லல் தீருமா!
சன்னல் திறக்குமா!

புது வெளிச்சம் காற்றுடன்
புழுக்கம் தீர்க்குமா!
மக்கள் இறுக்கம் போக்குமா!

வருந்தும் மாந்தர் வாழ்க்கை
வாட்டி வதைத்திடும்
அவலம் தீருமா!

கருவாட்டு மனிதன்

வேகாத வெய்யிலில்
வேகும் மனிதர்
சாயாத பொழுதில்
சாலையில் விளிம்பில்
சாரியாக

தம் பசி போக்க
நுங்கு விற்கிறார்
வெள்ளரியும் சேர்த்து
தம் பிழைப்பு கூடையுடன்
விரையும் மனிதரை
கூவி அழைத்து

வேகாத பொழுதில்
எரியும் தணலில்
தம் உடலும் சேர்த்து
எரிய

கரிய மேனியும்
மேலும் கருத்திட
வியர்வை வழிந்தோட

குடை பிடித்து விற்கலாமே!
நிழலில் சென்று விற்கலாமே!

"பச்சு காரனே ஏத்த மாட்டறான்,
பொழப்புக்கு என்ன செய்ய"

சவாரி

அவன் பார்த்தான்
கடந்து
நான் பார்த்தேன்
தொடர்ந்து
நான் பார்த்ததை
அவன் பார்க்கவில்லை

அவள் பார்த்ததை
நான் பார்த்தேன்
அவனும் நானும்
பார்த்ததை
அவள் பார்த்தாள்

பரபரப்பு போக்கில்
சுற்றிலும் சுழலும்
விழிகள்
வாகனத்தில்
வலம்

உணர்ச்சி விசையில்
உந்துதல் முயற்சியில்
ஊர்வலம்

ஒருவரை ஒருவர்
முந்தி
உடன் இருப்பவர்
குந்தி

எறும்பும் ஏலனம் செய்யும்
சாரி
குறும்பு சவாரி

வழியில்லையா?

இருக்கும் மொழியே எட்டவில்லை
எங்களுக்கு
பேச்சிலே அதன் மூச்சிலே
வாழ்கிறோம்
பேதமை பெற்றியாக
போதனை ஏதுமின்றி

கல்விச் சாலைகள்
எம் புல காட்சியாக

காதில் விழுகிற சேதி
புரியவில்லை

எமக்கு சீர் திருத்தமாம்
ஊர் திருத்தும் மாந்தர்
உளறல்

புதுமையாம்
கணினி உலகுக்கு
கை கொடுக்குமாம்

படித்தவரே பதைக்கிறார்
"உள்ளதும் போகும்
நொள்ள கண்ணா"
என்கிறார்

உருப்படியாய்
எம் மக்கள் இருக்கும்
மொழி
கற்றிட

அதன் வழி நின்றிட
வழியில்லையா?

வெறி!

கலப்படம்
எங்கும் எதிலும்!

புலப்படும்!
இறந்தவர்,இழந்தவர்
புலம்பலில்!

மருந்தில் தொடங்கி
விருந்தில் முடியும்
நீண்ட பயணம்!


சில காலம்
பெட்டிச் செய்தியாக!
பரபரக்கும்!

பட்டியல் மருந்துகள்
பட்டை பட்டையாக
சலை ஓரங்களில்!

குவியல் குவியலாக!
குப்பையுடன்,குப்பையாக

தொப்பைகளை நிரப்பிய
வெ(ற்)றியில்!

நவீன குடு,குடுப்பக்காரன்!

"உச்ச நீதி மன்றம் வரை தமிழ் ஒலிக்க
வேண்டும்"

குடு, குடு, குடு,.................

உமது வாக்கு பலிக்க வேண்டும்
குடு.குடு.குடு.....................

வரும் தேர்தலிலும் செயிக்க வேண்டும்
குடு,குடு,குடு...........................

மாற்றங்கள்!

எண்ணிறந்த ஏமாற்றங்கள்
என்னுள் விளைந்த
தடுமாற்றங்கள்!

கைப் பொருள் கரைந்த
காரணங்கள்!

கவனமற்ற காரியங்கள்!

கோபால்ட் 60

காயலாங் கடையின்னாலும்
காயலா வரலாம்
கதி மோட்சம் பெறலாம்
விதி ஏற்கும்
வீதி மாந்தர்

'குசில் கடை'
'மாயாபுரி மகிமை'